Web de Ulla Umia Lerez

O día 3 de agosto ás 21:00 horas no local cedido pola Cooperativa Galega Monte Cabalar na Estrada e o día 4 de agosto na Tenda da Ponte en Cuntis, o xerente entregou as primeiras cestas do que se espera sexan moitas máis.

Anxo Escariz Ferrín, veu de facer a primeira entrega de cestas listas para o consumo ás familias interesadas no proxecto de comercialización en circuítos curtos. Este lotes foron elaborados polos/as produtores/as inscritos/as no proxecto financiado con fondos propios do Grupo de Desenvolvemento Rural Ulla Umia Lérez.

Concretamente entregáronse 15 cestas de contido diverso entre o que destacan os produtos de horta, leite fresco, embutido ecolóxico, etc. Por suposto todo o xénero é dos produtores/as da zona que tamén estiveron presentes na entrega da cestas.

Segundo o xerente os/as produtores/as teñen que ver moito no éxito deste proxecto xa que son eles/as os/as que impulsaron dende o comezo o desenvolvemento do mesmo: “eles e elas xunto coas familias que consumen son actores claves no desenvolvemento sustentábel do territorio ao facer posíbel, por unha banda, un consumo alternativo e natural e por outra banda, ao deixar os beneficios económicos deste consumo aos/ás produtores/as locais, sen necesidade de intermediarios/as”.

As cestas son de prezo variado en función da súa composición pero, facendo unha estimación podemos dicir que unha cesta para unha familia de 4 membros estaría en torno aos 30 euros semanais.

Neste primeira entrega as familias aínda non puideron facer a encarga a través da plataforma web, pero tal como explicou o xerente, xa está todo preparado para comezar para facer os pedidos a través da rede.

Dende o GDR agárdase que moitas máis familias se apunten a este novo modelo de consumo responsábel e saudábel e anuncian que seguirán atendendo ás tarefas de promoción e dinamización coa asistencia á feiras, a través de charlas informativas, etc. Tamén estarán nesta primeira fase de planificación loxística e mantemento da plataforma dixital e por suposto no asesoramento aos produtores, pero insisten en que a finalidade última deste proxecto e tanto que produtores/as como consumidores/as se auto xestionen.