Web de Ulla Umia Lerez

O Concello da Estrada axudará ás agrupacións e asociacións culturais na tramitación de solicitudes das axudas englobadas dentro do programa de subvencións de apoio á cultura.

As bases da convocatoria deste ano foron publicadas hoxe no Boletín Oficial da Provincia. A regulación destas axudas establece que poden ser solicitadas por persoas físicas e xurídicas en ánimo de lucro e radicadas dentro da Provincia de Pontevedra.

O programa diríxese, en primeiro lugar, ao financiamento de instrumentos ou vestiario, no caso de grupos e asociacións musicais da nosa provincia. Tamén se engloba dentro delas o financiamento para a construción ou rehabilitación de centros culturais, ou a restauración de monumentos.

Por último, ao abeiro desta convocatoria tamén se pode solicitar o financiamento de concursos literarios, xornalísticos, actos folclóricos e musicais, intercambios culturais, certames, conferencias, etc., dentro do marco xeral de “actividades culturais”.

Axuda municipal para a presentación de solicitudes

Desde o Concello da Estrada, estase a informar ás asociacións de carácter cultural-musical sobre estas axudas mediante o envío de cartas. Ademais, a administración local colaborará coas entidades veciñais na tramitación destas axudas.

Os interesados en solicitar as axudas a través do Concello poderán achegarse ao edificio consistorial en horario de 9:00 a 14:00, na oficina de Cooperación Social, no segundo andar. Tamén poden contactar telefonicamente a través do número 986 570 165 (extensións 217 ou 315). Por último, en caso de que así se solicite por parte dos veciños, persoal municipal de asesoramento desprazarase ata a parroquia na cal a asociación interesada teña a súa sede, sempre previa concertación de cita.

O prazo para presentar solicitudes remata o día 2 de abril de 2010.